lië Ñoldorinwa! Ánin quetal, manen nalmë Valanduri?
Equët sa mahtëantë Moringottó, nan ero ar entë nar
minë liéo. Merintë cheru i ambar, nan nurtantë mardintassen
ar mahtanomenna úmat lelya! Yotornonyar ar yoþellinyar Endoressë ú tulkolmo nauvar ilyë mákinë, nauvar vanwë, undulávinë morniénen...
Ar i kotumo charya i marillai yar akáriën, charya i taura kálë alduo! I Valar úmër polë verya i ardantai ar sí i kálë ya në aina men avánië Moringottonen. Ar yando i aranella avánië!
Vá méranyë marë nórëssë yo lië makindov' atarinyava. Ar ellë, man ellë mérar? Mérallë serë sina menessë, tirë i urko ustala nórë apa nórë? Mérallë marë nyéressë, arwa nírion, i lië lumbuléva? Var mérallë mahta entuvien i charmalmá?
Kuiviénenzë i kelumi lissi, i vilya ú lumboron ar i nóri chairë ner. Echehtiëlmë i márelmá. Nan i márelma ëa er, lissë lá míruvórë Valaiva. Tulal yo nyë Endorenna yassë chiruvallë fairië! Tulal!
Úmam chíni, úmam móli Valaiva. Mérantë charya i Silmarillí yar karnë rankunen eldava. Chehtuvalmet sina menessë, milmentassë!
Meldonyar! Hlarnellë Atanion? I Apanónar lúmessë tuluvar. Úman ista të, úman ista ma nantë mani var umië. Nan ai úmam chorta, antuvantë ké i tulkonta Moringotton.
Chortal, meldonyar, chortal! Anda, sarda ar nyéreva nauva i tië, nan alasseva nauva i metta! Quetal namárië mandon ar quetal namárië charmallain! Nan mapal i makillai. Lelyuvalmë cháyavë, chaira lá Oromë, nauvam voronwë lá Tulkas. Chilyuvam Moringottonna, Arda-rímanna!
Charyaryë ohta, charyaryë tevië ar i ñuru. Ar ai entuvuvalmë i Silmarillí, nauvam i erye cherur oia kálëo ar cherur vanessëo, i turi Ambaro!
